Vendimet e falsifikuara, si u tjetërsua pronësia e qindra hektarëve tokë në Vlorë

Vendimet e falsifikuara, si u tjetërsua pronësia e qindra hektarëve tokë në Vlorë
Zvërnec, Vlorë

Hetimet e Prokurorisë së Vlorës kanë zbuluar një skemë kriminale me anë të së cilës qindra hektarë pronë turistike në gadishullin e Karaburunit dhe fshatin Zvërnec u tjetërsuan në mënyrë të paligjshme, duke përfshirë në arkivën e Gjykatës së Vlorës vendime të falsifikuara.

Gazetarja e BIRN Lindita Çela sjell në artikullin e saj tre raste ku me vendime gjykate të falsifikuara, seanca gjyqësore që nuk kanë ndodhur asnjëherë apo firmosje në fletë të bardhë, mijëra hektarë tokë në Vlorë janë tjetërsuar.

rastin e parë, Raimond Mëzi, me profesion varrmihës e që jeton në një shtëpi të varfër në Vlorë, rezulton të jetë pronar i një sipërfaqe prej 220 hektarësh në gjirin e Shën Vasilit, pronë që kap një vlerë tregu prej 210 milionë euro. Vendimi i gjykatës që e bën Zotin Mëzi pronar është i falsifikuar.

Zoti Mëzi u arrestua në vitin 2016 së bashku me avokatin e tij Enkes Hysendhima, por u liruan më vonë me urdhër të prokurorisë. Mëzi i tha BIRN se ai nuk kishte lidhje me falsifikimet e bëra dhe ishte thjeshtë një viktimë. Sipas dokumenteve që BIRN disponon, emri i Mëzit duket se është përdorur vetëm për sigurimin e pronës, e cila më pas është shitur nga avokati Enkes Hysnedhima, falë një prokure përfaqësimi.

Sipas Mëzit, në vitin 1994 i ati Jakupi, kishte bërë një kërkesë në Agjencinë e Kthimit dhe Kompensimit të Pronave, për rikthim e një sipërfaqe prej 6,600 metra katrorë të konfiskuar nga regjimi komunist në qytetin e Vlorës.

Bazuar në këtë kërkesë të Jakupit, në Gjykatën e Vlorës është gjetur një vendim i atribuar gjykatësit Thoma Nika me datë 29 Dhjetor 2000, që e bën Raimond Mezin pronar të 220 hektarëve tokë në Karaburun. Në Tetor 2012-të, në Zyrën e Regjistrimit të Pasurive të Paluajtshme është bërë një kërkesë për ta regjistruar këtë pronë në emër të Raimondit, ndërsa 2 vjet më vonë prona i është shitur palëve të treta. Prokuroria dyshon se e tërë dosja gjyqësore është falsifikuar pasi gjyqtari Thoma Nika ka deklaruar se kurrë nuk ka zhvilluar një proces të tillë gjyqësor në vitin 2000. Mëzi i ka deklaruar prokurorëve se dokumentet e shitjes në zyrën e noterit i ka firmosur në fletë të bardhë.

Rasti i dytë ka përsëri në qendër Zotin Raimond Mëzi. Nëpërmjet një vendimi gjyqësor të vitit 2003, i cili i atribuohet gjyqtarit të ndjerë Skerdilajd Konomi, Mëzi është shpallur pronar i një sipërfaqe tjetër në Zvërnec. Nga hetimet e kryera, ka rezultuar se dokumentacioni që ka shërbyer për njohjen, kthimin dhe më pas regjistrimin e kësaj prone, është i falsifikuar. Prokuroria e ka konstatuar si tërësisht fiktiv këtë vendim, pasi, në kohën e dhënies së vendimit, i ndjeri Konomi nuk ka qenë gjyqtar.

rastin e tretë, për një sipërfaqe toke prej 5,2 hektarësh po në Zvërnec është përdorur sërish e njëjta skemë. Sipas hetimeve të Prokurorisë së Vlorës, kjo pronë është regjistruar fillimisht me anë të një vendimi të falsifikuar në emër të shtetases, Shqiponjë Emina, e cila rezulton e vdekur. Prona më pas është  shitur tek persona të tretë. Dosja e gjyqësore dhe pse mban vitin 1996, ka mbishkrimin Republika Popullore Socialiste e Shqipërisë- emërimi zyrtar i vendit nga vitit 1976 deri në vitin 1991. Ky vendim rezulton të jetë dhënë në emër të gjyqtarit Qatip Bylykbashki, i cili rezulton të ketë qenë pjesë e gjykatës gjatë periudhës së komunizmit dhe është larguar nga vendi në vitin 1990.

Për të treja këto raste e për shumë të tjera hetimet vazhdojnë ende, ndërkohë që pronat e tjetërsuara janë sekuestruar me urdhër të Prokurorisë së Vlorës.

 



Lini një koment

1 Koment për "Vendimet e falsifikuara, si u tjetërsua pronësia e qindra hektarëve tokë në Vlorë"

avatar
trackback

[…] http://www.kohajone.com/2017/07/09/turizmi-shqiptar-deshtim-spektakolar/ Vendimet e falsifikuara, si u tjetërsua pronësia e qindra hektarëve tokë në Vlorë […]

wpDiscuz